Vazhdojnë hetimet për vrasjen e të riut në Shkodër nga xhaxhai i tij.
Shkak për këtë ngjarje të rëndë është bërë një debat për oborrin e përbashkët.

Ngjarja e djeshme mund të kishte ndodhur edhe para katër vitesh pasi Bujar Kuçi ka tentuar që të vrasë nipin e tij.

61- vjeçari kishte siguruar një çifte nga një shok i tij dhe prej disa kohësh e mbante në shtëpi. Sërish debati ka qenë i njëjtë, për çështjen e oborrit.

Mirsad Kuçi dhe Bujar Kuçi kanë debatuar mes njëri-tjetrit dhe pas debatit xhaxhai ka marrë çiften që posedonte dhe e ka vendosur në dritaren e shtëpisë së tij, shkruan Panorama.

Nga dritarja, ai ka tentuar që të qëllojë mbi nipin e tij, por nuk ka arritur që të shkrehë armën e gjahut, pasi nuk ka ditur ta përdorë ashtu siç duhet atë.

Në atë kohë, policia arrestoi 61- vjeçari, si dhe i sekuestroi armën që e kishte pa leje.

Por, atë që nuk arriti të çonte deri në fund katër vite më parë, fatkeqësisht Bujar Kuçi e ka realizuar dje duke qëlluar me thikë mbi djalin e vëllait të tij.

Mirsadi ishte djali i vetëm i Faik dhe Fatmira Kuçit, të cilët kanë dhe dy vajza.

Nga ana tjetër, Bujar Kuçi rezulton më parë i divorcuar, ndërsa ka dhe një djalë bashkëmoshatar me djalin e vëllait të tij, të cilin e vrau me thikë pas debatit për parkimin e makinës para oborrit.